Թաթար բորակի. Հայկական խոհանոցի ամենահամեղ ու մատչելի ուտեստը
Հայաստանի ամբողջ տարածքում այս ուտեստը կոչվում է Թաթար բորակի, և միայն Գյումրիում՝ Թաթար Բորանի: Շատ հագեցնող, համեղ ուտեստ է, որը կարելի է պատրաստել, եթե տանը ոչինչ (կամ գրեթե ոչինչ) չկա:
Ավելի լավ է այն ուտել առավոտյան կամ ճաշին, քանի որ սա բավական ծանրամարս կերակուր է: Եթե դեռ չեք փորձել այս ուտեստը, ապա պահպանեք բաղադրատոմսը և կրկնեք այն ձեր խոհանոցում:
Պարզեցված ներկայացնելու դեպքում սա աղ արած ջրի մեջ եփված խմորի բարակ կտորներ են, որոնք մատուցվում են տապակած սոխով և սոուսներով: Սոուսը կարելի է փոխարինել սխտորով թթվասերով կամ մածունով: Հագեցնող ուտեստ, որն ունի շատ պարզ պատրաստման եղանակ:
Թաթար բորակի. Անհրաժեշտ բաղադրիչներ
_ ձու — 1 հատ
_ ջուր — 1/2 բաժակ
_ ալյուր — 1.5 բաժակ (մոտավորապես)
_ աղ — ըստ ճաշակի
_ սոխ — 1 գլուխ
_ սխտոր — 1 պճեղ
_ թթվասեր (կամ մածուն) — 100 գրամ
_ բուսական յուղ (կամ կարագ) — 1 ճաշի գդակ
Թաթար բորակի. Պատրաստման եղանակը
_Խառնել ձուն, աղը և ջուրը փոքր ամանի մեջ: Հարել, մինչև միասեռ դառնա:
_Ավելացնել մաղած ալյուրը: Հունցել պինդ խմոր: Թող խմորը հանգստանա 30 րոպե:
_Մաքրել, կտրատել ու տապակե սոխը մինչև ոսկե դարչնագույնը: Իդեալական տարբերակն է սոխը կարագով տապակել: Բայց կարող եք վերցնել բուսական և սերուցքային յուղերի խառնուրդ:
_Թթվասերին կամ մածունին ավելացնել ճզմած սխտոր և խառնել:
_Խմորը բարակ շերտով գրտնակել: Այդ ընթացքում կաթսայով ջուրը եռացնել:
_Բարակ շերտով գրտնակած խմորը կտրատել քառակուսի կամ ինչպես ուզում եք: Լցնել խմորն արդեն լավ եռացող աղաջրի մեջ և եփել մոտ 4-5 րոպե, մինչև որ փափկի ու պելմենների նման սկսի լողալ ջրի երեսին:
_Պատրաստի խմորը գդալով զգուշորեն հանել և դնել մատուցման ափսեի մեջ: Վերջում վրան լցնել սոխեռածը և սխտորով սոուսը: Այս հարցում կարող եք առաջնորդվել ըստ ձեր նախասիրության, կարելի է սխտոր ու սոխ չվերցնել, այլ միայն յուղ, կարագ, թթվասեր լցնել:
Թաթար բորակին պատրաստ է: Մատուցեք և վայելեք:
Բարի ախորժակ!
Խմորով ուտեստների սիրահարներին առաջարկում ենք նաև սա
Տեսանյութ
Թաթար Բորակի կարող եք պատրաստել նաև պելմենիի ավելացած խմորից, որի պատրաստման տեսանյութը կտեսնեք ստորև․