Այսօր պատրաստելու ենք ընտիր Շերտավոր խմոր, որը չստացվելու ոչ մի տարբերակ չունի, անգամ սկսնած թխողները հենց առաջին անգամից կստանան պղպղջակներով գրդնակվող խմոր և հրաշալի շերտերով թխվածք։
Բաղադրիչներն էլ բավականին պարզ են, ընթացքում կտեսնեք։
Շերտավոր Խմոր Բաղադրիչներ
_Ձվի դեղնուց — 3 հատ
_3 բաժակ գոլ ջուր
_Ձիթայուղ — 1 բաժակ — 200 գրամանոց
_Քացախ — 1 ճ․ գդ․
_Լիմոնի աղ — 0,5 թ․ գդ․
_Աղ — 1 թ․ գդ․
_Ալյուր — 1կգ․ մոտ, այնքան որ ստացվի փափուկ ձեռքերին չկպնող խմոր
_Կարագ — 750 գրամ (3 տուփ- կես տուփ յուրաքանչյուր գնդի համար)
Շերտավոր Խմոր Պատրաստման եղանակը
_3 ձվի դեղնուցը առանձնացնենք, մի փոքր խառնենք
_Պետք է ավելացնենք 3 բաժակ գոլ ջուր, բաժակի չափսը 200 գրամ է
_Յուրաքանչյուր բաղադրիչը լցնելուց հետո խառնում ենք և անցնում հաջորդին
_Նույն բաժակով լիքը ձիթայուղ ենք լցնում
_Այնուհետև քացախ 1 ճաշի գդալ
_Որին կհաջորդի 1 թեյի գդալ աղը, կարելի է և ավելի քիչ ավելացնել աղ
_Կես թեյի գդալ լիմոնի աղ ենք լցնում, դա շերտավոր խմորի պարտադիր բաղադրիչն է, կարելի է ասել
_Այժմ սկսում ենք ալյուրը լցնել այնքան, որ ստացվի փափուկ ձեռքերին չկպնող խմոր, մոտավորապես 1 կիլոգրամ է լինելու
_Սկզբնական կարելի է 2-3 բաժակ լցնել, ապա պարբերաբար ավելացնել խառնելով ըստ անհրաժեշտության
_Սեղանին ավելի հարմար է․ շարունակենք սեղանի վրա
_Երբ արդեն խմորը կհավաքվի և չի կփչի մատներին, արդեն կարող ենք գլանակաձև զանգվածը մեր, բաժանել 6 մասի
_6 գունդը իդեալական է այս չափաբաժնի համար, որպեսզի հետագայում էլ հեշտ լինի բացելը
_Գնդում ենք յուրաքանչյուր չափաբաժինը և սկուտեղը ալրոտում ենք և շարում վրան
_Կերակրի թաղանթով անպայման ծածկենք, կարող ենք նաև յուրաքանչյուրը առանձին առանձին ցելոֆոնապատենք, բայց այս կերպ էլ շատ հարմար է, վրան էլ սրբիչով կծածկենք և մեկ ժամով կդնենք կողքի, որպեսզի խմորը հանգստանա
_Մեկ ժամ անց արդեն պետք է կարագով լցոնենք, բառիս բուն իմաստով, այս փուլում գրդնակ չենք օգտագործում, պարզապես մի փոքր ալրոտենք տարածքը և խմորը մատներով բացենք մի փոքր
_Կես տուփ փափկած կարագը 200-225 գրամ դնում ենք այս խմորե շրջանակի կենտրոնում, մի փոքր տարածում մատներով և փակում մեր լցոնած գունդը ահա այսպես
_Բոլոր գնդերը կարգավորելուց հետո, դե կարագով լցոնելուց և ցելոֆոնապատելուց հետո թողնում ենք մեկ ժամով հանգստանա
_Մեկ ժամ անց արդեն պետք է առաջին անգամ բացենք՝ գրդնակենք
_Գրդնակում ենք մեծ տրամագծով որքան հնարավոր է, այն պետք է ծալենք հետևյալ սկզբունքով, աջից դեպի կենտրոն բերենք և նույնն էլ ձախից, այնպես, որ իրար վրա չնստեն եզրերը և հատվեն ուղիղ կենտրոնում
_Ապա վրա ենք բերում և ծալում ենք հենց կենտրոնից
_Շերտավոր խմորի դեպքում ամեն նրբություն պետք է հաշվի առնել, քանի-որ անգամ ծալելու ձևից կախված խմորի որակը կարող է ընկնել
_Ահա այսպես իրար վրա բերելով, նորից հետևելով, որ ծալքերը իրար վրա չընկնեն ծալում ենք, կրկին շարում սկուտեղի վրա և նորից պետք է թողնենք մեկ ժամով հանգստանալու սենյակային ջերմաստիճանում
_Այս ընթացքում դեռ սառնարան դնելու կարիք չկա
_Մեկ ժամ անց երկրորդ անգամ ենք բացելու
_Եվս մեկ նրբություն, մինչև գրդնակել սկսելը հարկավոր է մատներով մի փոքր տարածել այնպես, որ աջ և ձախ կողմերից շերտերը հնարավորինս չլղոզվեն և հնարավորինս երկար ժամանակ պահպանվեն գրդնակելու ընթացքում
_Հերթական անգամ բոլոր գնդերը բացել և նշված սկզբունքով փակելուց հետո կրկին թողնում ենք մեկ ժամ սենյակային ջերմաստիճանում հանգստանալու
_Այո, շերտավոր խմոր պատրաստելիս պետք է զինվել մեծ համբերությամբ և սիրով պատրաստել խմորը, որպեսզի թխվածքի յուրաքանչյուր շերտ լավ բացվի
_Երրորդ անգամ ենք բացում և փակում մեկ ժամ անց, ձեզ չխճճվելու համար նաև գրավոր նշել եմ, այո սա երրորդ անգամն է
_Եթե պատրաստվում եք անմիջապես թխվածք թխել, ապա երրորդ անգամ բացել փակելուց հետո սենյակային ջերմաստիճանում կթողնենք ևս մեկ ժամ խմորին հագստանալու և նոր կսկսենք թխել
_Իսկ եթե հաջորդ օրն եք պատրաստվում թխել որևէ շերտավոր թխվածք, ապա սկուտեղով ցելոֆանապատ գիշերը թողեք սառնարանում
_Եթե ամբողջը չեք թխելու, և մի քանի օր կամ ընդհուպ մինչև ամիս կարիք չեք ունենալու թխելու մնացած գնդերը, ապա անմիջապես երրորդ անգամ բացելուց հետո արդեն պահեք սառցախցիկում
_Խոստանում եմ ձեզ մեր պատրաստած այս խմորից շատ գեղեցիկ շերտավոր գաթայի կտրվածքներ ներկայացնել մեր հաջորդ տեսանյութերից մեկում
Շերտավոր Խմոր․ Ընտիր, Չստացվելու ոչ մի Տարբերակ Տեսանյութ
Դե ինչ, բարի ախորժակ։
