Սիսեռով չարազ. Մենք առաջարկում ենք այս նախուտեստը պատրաստել երկու տարբերակով` քաղցր և աղի: Պատրաստեք և կհամոզվեք, որ շատ քիչ բան է պետք հանգստյան օրերին հավաքվելու համար:
Սիսեռը մենք սովորաբար օգտագործում ենք որպես ապուրի բաղադրիչ, կամ պասուց տոլմայի մեջ: Ոմանք ավելացնում են նաև հումուսի պատրաստումը, բայց այս հատիկեղենը շատ բազմակողմանի է, դրանից շատ բան կարելի է պատրաստել: Վերջերս ես սրճարանում գարեջրի հետ աղի սիսեռ համտեսեցի ու հիացած էի այդ համեղ ու խրթխրթան նախուտեստից:
Այս «չարազները» երեկույթների, դիսկոտեկների ու սրճարանների ամենատարածված նախուտեստներից կարող են լինել: Փաստորեն հարավային երկրներում այս կծու նախուտեստները փոխարինում են ադիբուդիին և չիպսերին:
Սիսեռով չարազ. Անհրաժեշտ բաղադրիչները
_Սիսեռ 400 գ
_Կարագ 20 գ
_Շաքար 3 ճաշի գդալ
_Քրքում 10 գ
_Հիլ 10 գ
_Մշկընկույզ 5 գ
_Սև պղպեղ (աղացած) 10 գ
_Կարմիր պղպեղ 1 ճաշի գդալ
_Համեմի սերմ 1 թեյի գդալ
_Աղ` ըստ ճաշակի
_Ձիթապտղի յուղ 0,5 բաժակ
Սիսեռով չարազ. Պատրաստման եղանակը
_Երեկոյան թրջել 400 գ սիսեռ և թող մնա ողջ գիշեր: Ապա դրա կեսը քամել մաղի վրա, կաթսայի մեջ լցնել, ծածկել թարմ ջրով, եռացնել և եփել 20 րոպե: Պատրաստի սիսեռը ողողել սառը ջրով և չորացնել թղթե սրբիչի վրա:
_Կծու սիսեռի պատրաստման համար առանձին ամանի մեջ խառնել սիսեռը, կարմիր պղպեղ, սև պղպեղ, աղ և ձիթապտղի յուղ: Լցնել յուղաթղթով ծածկված ջեռոցի տապակի վրա և դնել ջեռոցում 200 աստիճանի տակ 40 րոպե: Յուրաքանչյուր 10 րոպեն մեկ խառնել, որպեսզի սիսեռը հավասարապես բովվի:
_Քաղցր սիսեռի պատրաստելու համար օգտագործեք մնացած խաշած սիսեռը: Կարագը հալեցնել տապակի մեջ, խառնել շաքարի, մի պտղունց աղի, աղացած հիլի, մշկընկույզի և սև պղպեղի հետ: Տաքացնել այնքան, մինչև շաքարը հալվի:
Ավելացնել սիսեռը և խառնել: Տապակել հատիկեղենը 5 րոպե, այնուհետև կրակից հանելով՝ թողնել սառչի տապակի մեջ:
Այս նախուտեստը պահվում է ոչ ավելի, քան երեք օր, բայց կարող եք երկարացնել պահպանման ժամկետը, եթե դրանք մի փոքր չորացնեք նախապես տաքացրած վառարանում: Սիսեռը կկորցնի խոնավությունը և խրթխրթան կդառնա:
Սիսեռով չարազը պատրաստ է:
Բարի ախորժակ
Տեսանյութ
Արագ պատրաստվող քաղցրավենիք