Ես ձմռան համար շատ եմ փակում Լոլիկն իր հյութի մեջ և բոլորին խորհուրդ եմ տալիս պատրաստել:
Նման լոլիկները կարող են օգտագործվել պիցցայի, բորշչի պատրաստման, տարբեր ճաշատեսակների հավելումների համար, որտեղ անհրաժեշտ է օգտագործել լոլիկի հյութ կամ մածուկ։
Լոլիկն իր հյութի մեջ. Հարկավոր են հետևյալ բաղադրիչները
_ լոլիկ
_ աղ 1 ճաշի գդալ
_ շաքարավազ 3 ճաշի գդալ
_ սխտոր, կանաչիներ, համեմունքներ ձեր ճաշակի և ցանկության համաձայն
Լոլիկն իր հյութի մեջ. Պատրաստման եղանակը
_ Վերցրեք հյութալի, փափուկ, մսոտ լոլիկներ հյութի համար:
_ Լոլիկի մյուս մասը պինդ սորտերի, անվնաս պտուղներ պիտի լինեն։
_ Մաքուր բանկաների մեջ պինդ լոլիկները դնել՝ պոչերը հանելուց հետո։ Լոլիկները կարող եք ամբողջությամբ կամ կտրատած դնել:
_ Փափուկ լոլիկը բլենդերով հարել խյուսի աստիճան։ 1 լիտրանոց բանկայով լոլիկի համար անհրաժեշտ կլինի մոտ մեկ լիտր լոլիկի հյութ։
_ Լոլիկների վրա լցնել եռման ջուր, ծածկել կափարիչներով և թողնել 15 րոպե։
_ Քամել ջուրը և նորից լցնել եռման ջուր, թողնել 7 րոպե։
_ Ջուրը քամել։
_ Լոլիկի հյութը հասցնել եռման աստիճանի, ավելացնել աղ ու շաքարավազ, եփել մոտ 5 րոպե։ Այս փուլում հյութը բուրավետ դարձնելու համար կարող եք ավելացնել տարբեր համեմունքներ, սխտոր, կանաչիներ։
_ Լցնել լոլիկի հյութը բանկաների մեջ, փակել կափարիչները, շրջել բանկաները գլխիվայր և սրբիչով ծածկած թողնել, մինչև սառչեն:
Պահածոները կարող եք պահել նկուղում կամ մառանում:
Շատ բուրավետ, լոլիկը բնական համով, ուղղակի իսկական հաճույք է։ Պարզապես փորձեք մի քանի բանկա պատրաստել, ձեզ անպայման դուր կգա այս բաղադրատոմսը։
Բարի ախորժակ:
