Ձմռան համար վարունգի մարինադ պահածոյացնելու լավ բաղադրատոմս ենք առաջարկում:
Այս պահածոն կարելի է տալ նույնիսկ փոքրիկ երեխաներին, մանավանդ որ վարունգները մի փոքր քաղցրահամ են ստացվում:
Բաղադրիչների քանակը հաշվարկված է երեք լիտրանոց բանկայի համար: Եթե ցանկանում եք ավելի շատ պատարստել, ապա պարզապես համամասնորեն ավելացրեք բաղադրիչների քանակը:
Պետք է չմոռանալ բանկաների նախնական ստերիլիզացման մասին: Այն կարող է իրականացվել տարբեր եղանակներով` գոլորշիով, եռման ջրով, ջեռոցում, միկրոալիքային վառարանում: Մշակելուց առաջ անհրաժեշտ է ուշադիր ստուգել բանկան: Այն չպետք է ունենա ճաքեր կամ քերծվածքներ:
Վարունգի մարինադ առանց քացախի. Բաղադրությունը
_Վարունգ 2 կգ
_Աղ 2 ճաշի գդալ
_Շաքար 5 ճաշի գդալ
_Կիտրոնաթթու 1.5 թեյի գդալ
_Հաղարջի տերև 2 հատ
_Սխտոր 2 պճեղ
_Դափնու տերև 2 հատ,
_Սամիթի հովանոց 1 հատ
_Սև պղպեղ 3 հատիկ
Վարունգի մարինադ առանց քացախի. Պատրաստման եղանակը
_Լվանալ վարունգները մանրակրկիտ կերպով: Դրանք շարել բանկայի մեջ, հաղարջի տերևների, սխտորի, դափնու տերևի, սամիթի հովանոցի և պղպեղի վրա: Լցնել եռացրած ջուրը, թողնել 15 րոպե:
_Ջուրը դատարկել կաթսայի մեջ, հասցնել եռման և 15 րոպեով կրկին լցնել վարունգների վրա:
_Պատրաստել մարինադ այդ քամված ջրից: Դա անելու համար ավելացնել աղ, կիտրոնաթթու և շաքար:
_Խառնուրդը հասցնել եռման և լցնել մինչև բանկայի պռունկը: Ստերիլիզացված կափարիչով ամուր փակել:
_Անմիջապես գլխիվայր շրջել բանկան և փաթաթել ծածկոցով: Երբ բանկան ամբողջովին սառչի, կարող եք տեղափոխել մառան:
Ձմռանը կարելի է սրանով հյուրասիրել երեխաներին և զգայուն ստամոքսով մարդկանց:
Վարունգի մարինադն առանց քացախի պատրաստ է:
Բարի ախորժակ:
