Լավաշով ռուլետ աղացած մսով
Եթե փնտրում եք արագ նախուտեստի տարբերակ, կամ բնության գրկում հեշտ սնվելու հնարավորություն, ապա մեր առաջարկած բաղադրատոմսը հաստատ դուր կգա: Ինձ այս բաղադրատոմսը տվել է մորաքույրս, նա հաճախ է սա պատրաստում տարբեր առիթներով: Ինքս բազում անգամներ փորձել եմ, այնօես որ կիսում եմ այս համեղ ուտեստի բաղադրատոմսը, որը կարող եք պատրաստել շատ արագ ու բոլորովին չամաչել հյուրերից:
Լցոնի համար պետք է վերցնել միայն թարմ միս: Ավելի լավ է միսը ինքնուրույն աղալ, քան գնել խանութից: Կարող եք վերցնել, հավ, տավարի միս կամ խառնել տարբեր տեսակի մսեր: Ավելացնել մի քանի անուշաբույր համեմունք և կանաչիներ՝ աղացած մսով լավաշով ռուլետի ձեր յուրահատուկ համը ստանալու համար:
Լավաշով ռուլետ աղացած մսով. Անհրաժեշտ բաղադրիչները
- Աղացած տավարի միս 400 գ
- Լավաշ 1 հատ
- Ձու 3 հատ
- Սոխ 1 հատ
- Կոշտ պանիր 50 գ
- Աղ ըստ համտեսի
- Սև պղպեղ (աղացած) ըստ համտեսի
Լավաշով ռուլետ աղացած մսով. Պատրաստման եղանակը
- Աղացած մսին խառնել մանրացված սոխը, 2 ձու, աղ և պղպեղ: Ըստ ճաշակի կարող եք ավելացնել այլ համեմունքներ:
- Լավաշը փռել աշխատանքային մակերեսի վրա, վրան քսել աղացած մսով լցոնը և ոլորել ռուլետը:
- Ծածկել ջեռոցի տապակը յուղաթղթով, դրա վրա դնել ռուլետը և դնել այն 180 աստիճան տաքացրած ջեռոցում 40 րոպե:
- Թխելու ընթացքում հարել ձուն և քսել ռուլետին յուրաքանչյուր 10 րոպեն մեկ: Եփվելուց 5 րոպե առաջ վրան ցանել քերած պանիրը:
Թող լավաշը մի փոքր սառչի, ապա մատուցեք: Փխրուն պանրով կեղևը և հյութալի մսի միջուկը հիանալի կերպով լրացնում են միմյանց:
Լավաշով ռուլետն աղացած մսով պատրաստ է:
Բարի ախորժակ: