Այսօր առաջարկելու ենք նորույթ՝ բոլորովին նոր տաք ուտեստի բաղադրատոմս։ Պատրաստելու ենք կոլոլակով բրնձով փլավ։
Միգուցե զարմանալի համադրություն և պատրաստման տարբերակ կթվա, բայց ստացվում է բոլորովին նոր հետաքրքիր, հյութեղ և աննկարագրելի համեղ փլավ։
Եթե փորձեք, խնդրում եմ գրեք ձեր կարծիքը մեկնաբանությունների բաժնում։
Կոլոլակով բրնձով փլավի բաղադրիչները
- Բրինձ — 250 գր․
- Տավարի աղացած միս — 200 գր․
- Գազար — 1 հատ
- Սոխ — 1 գլուխ
- Ձու — 1 հատ
- Ձիթայուղ
- Չոր համեմունքներ
- Աղ, սև և կարմիր չոր պղպեղ
Կոլոլակով բրնձով փլավի պատրաստման եղանակը
- Սկսենք մսի նախապատրաստումից․ աղացած տավարի մսի վրա ավելացնում ենք ձուն, աղ և կարմիր պղպեղ ենք անում, կես սոխը աղացած կամ քերիչով անցկացված ավելացնում ենք մսի վրա և մի լավ խառնում ենք,
- Ձեռքերով ահա այսպիսի կոլոլակներ ենք պատրաստում և դնում կողքի, կարող եք սառցախցիկում դնել, որպեսզի պատրաստելիս չքանդվի,
- Իսկ մինչ այդ գազօջախի վրա դրված թավայի մեջ ձիթայուղ ենք լցնում,
- Բրինձը, մանրացված գազարն ու սոխը միաժամանակ լցնում ենք թավայի մեջ և սկսում տապակել։ Տապակելու գաղտնիքն այն է, որ այս դեպքում եփվելիս բնինձը երբեք չի կպնում իրար, իսկ փլավը նոր հետաքրքիր համ է ստանում,
- Տապակվելու ենք ուղարկում նաև մեզ սառցախցիկում սպասող կոլոլակները և մոտ 2 րոպե այս ամբողջը զգույշ խառնելով շարունակում տապակել,
- Եռացրած ջուր ենք լցնում, այնքան որ ծածկի և թավայի կափարիչը լրիվությամբ փակում ենք,
- Պետք է եփվի մոտ 15 րոպե և ջուրը ամբողջությամբ քաշի։
Մատուցելիս բուրգի գագաթին կարող եք խաշած ձվի դեղնուց լցնել և չոր համեմունքներից ավելացնել կորեական աղցանի համար նախատեսված չոր համեմունք, ինչպես ես։
Բարի ախորժակ։
