Պանրով թխած կարտոֆիլ. Սխտորայուղով համեմված համեղ ջեռեփուկ

Պանրով թխած կարտոֆիլ փորձելուց հետո դուք այլ կերպ տապակելու մասին չեք մտածի: Մանավանդ որ պանրով թխած նման գեղջկական եղանակով կարտոֆիլը սխտորով կատարյալ է մի շարք մսային և ձկան ուտեստների համար:

Պանրով թխած կարտոֆիլ. Հարկավոր են հետևյալ բաղադրիչները

— կարտոֆիլ 5 հատ

— կոշտ պանիր, քերած 5 ճաշի գդալ

— սխտոր 4 պճեղ

— կարագ 100 գ

— թթվասեր 1 ճաշի գդալ

— կանաչի 3 ճաշի գդալ

Պանրով թխած կարտոֆիլ. Պատրաստման եղանակը

_Սխտորայուղ պատրաստելու համար կարագը խառնել աղի, կտրատած կանաչիների, մանրացված սխտորի և քերած պանրի հետ։ Սոուսը խառնել և ըստ ճաշակի վրան ավելացնել աղ ու պղպեղ, թթվասեր և այլ համեմունքներ։ Թող սոուսը մնա 5-10 րոպե։

_Մաքրել կարտոֆիլը, չորացնել թղթե սրբիչներով:

_Թխելու ամանը կամ ջեռոցի տապակը յուղել բուսայուղով և լցնել կարտոֆիլը։

_Կարտոֆիլի կտորներին առատորեն քսել սոուսը:

_Ջեռոցը տաքացնել 220 աստիճանով և թխել 40-50 րոպե, մինչև պատրաստ լինի:

Կարտոֆիլն էլ ավելի համեղ դարձնելու համար կարելի է մի փոքր այլ կերպ անել։ Յուրաքանչյուր կարտոֆիլ կիսել, կեսերի մեջը փորել, մանրացնել այս մասը, խառնել աղացած մսի, սնկի, խոզապուխտի կամ նրբերշիկի կտորների, լոլիկի հետ։

Եվ այս միջուկի վրա արդեն քսել սխտորով սոուսը։ Նման կարտոֆիլի նավակները կլինեն երկուսը մեկում՝ և՛ կողմնակի ճաշատեսակ, և՛ նախուտեստ:

Բարի ախորժակ:

Տեսանյութ

Կարտոֆիլ ջեռոցում